BRASIL
Brasil
Di filiz brasiléro,
Tera di carnaval,
Co su alegre sombréro...
Pa Brasil nôs vêm cantá,
Co Brasil prendê sambá,
Burifado di amôr...
Brasil, sômente vôs, Brasil!
Brasil, filiz achado di Cabral,
Dóci lembránça di passado,
Filo di nôs-sua Portugal...
Brasil, Brasil vôs quánto más
Co alma jóvi vêm sambá,
Más arto-arto lôgo empê,
Quirido más lôgo ficá...
Sã!... Quelora vôs onçôm crecê,
Mundo intéro achá
Quánto vôs ta merecê,
Brasil, sômente vôs, Brasil!
Brasil, di alegre sámba capital,
Portám aberto pa Macau,
Como vôs nádi têm igual...
Brasil,Brasil têm coraçám,
Co alegria acolhê,
Na alma di vôs-sua Naçám,
Quim vôs-sua porta vai batê...
Sã!... Quelora vôs botá fervôr,
Mundo intéro olá
Quánto vôs têm di amôr,
Brasil, sômente vôs, Brasil!
